Hmasawnna hnathawh endik

Mizoram Legislative Assembly hnuaia Commi-ttee on Local Fund Accounts (COLFA) chuan, nimin khan Aizawl Muni-cipal Corporation (AMC) Ward-I chhunga Durtlang, Durtlang North, Leitan, Muanna Veng, Selesih leh Zuangtui an tlawh a; 13th Finance Commission Grant 2013-14 chhunga sum hmuh hmanga hna thawhte an enfiah.

Leitan YMA Hall-a inkhawm tâwi buatsaihah COLFA chairman John Siamkunga chuan, COLFA din chhan leh hnathawh dan sawifiahin, "Mipui thlan local council member-te'n khawtlang ṭhatna leh hmasawnna tura sum an hmuhte dik takin an hmang em tih en zuitu, CAG report behchhana sum hman dan tur ruahmanna siam leh a hna a inmil em tihte leh, sum sen leh hnathawh a inmil em tihte chhuizuitu a ni," an ti a; COLFA chu thil dik lo tite hrem tura rawtna thlen thei leh ngaidam thei tura thuneihna nei a nih thu a sawi.

John Siamkunga chuan, hna thawhna tur sum chu mipuiin chhiah tlingkhawm a nih thu sawiin, "Mipui sum a nihna tur dik taka hmang a, rinawm leh fimkhur taka hna thawk a, ram tana rotling siam se tih chu kan duh ber a ni," a ti.

COLFA hian Mizoram district hrang hrang an tlawh hnuah Aizawl khawpui chhung an tuam leh mek a, nimin khan AMC Ward-I chhunga veng hrang hranga step, retaining wall, footpath, market extention, tile phah, in leh kudam sakte an tlawh a, vawiinah Ward VII leh VIII an tlawh leh ang.

COLFA-ah hian member-te chu - T Sang-kunga, Lalthanliana, R Vanlavena, Lalrinawma leh Vanlalawmpuii Chawngthu te an ni.