KHAWTHLIR

Kraws kawngzawh

Mizorama Roman Catholic kohhrante chuan, vawiin hian chawhma dar 11 aṭangin Khawruhlian Kalvari tlangah 'Kraws kawngzawh' an nei dawn. Catholic-te hian kum 2016 hi 'Year of Mercy' (Zahngaihna Kum) atan an puang a, chumi pual chuan Year of Mercy Organising Committee, Aizawl Diocese-in Kalvari Tlang, Khawruhlianah 'Kraws kawngzawh' an huaihawt dawn a, Mizoram hmun hrang hrang aṭangin an kohhran mite an tel ang.

Appellate authority

Right to Information Act, 2005 Section 19, Sub-Section (1) hmangin, State Election Commission secretary Teresy Vanlalhruaii chu State Election Commission office Appellate Authority atan ruat a ni.

Hmalakna endik

India ramin buh leh bâl hlâwk leh tam zawk a thar chhuah theihna tura sorkar laipui ruahmanna, National Food Security Mission (NFSM) hnuaia hmarchak biala endik hna thawktu, National Level Monitoring Team-te chuan nimin khan Serchhip district-a Agriculture deprtment hmalak mekte an endik.

Nungcha humhalh zirho

Compensatory Afforestation Fund Management & Planning Authority bultumin Association for Environmental Preservation chuan, nimin khan PCCF Conference Hall-ah 'Wildlife conservation' chungchang zirhona an buatsaih a; Central YMA general secretary Lalhmachhuana khuallian niin, ASEP member-te leh nungcha humhalhna kawnga tui mi eng emaw zat an tel.

NLUP sem

Nimin khan Lawngtlaia Sericulture department chuan, NLUP third phase leh fourth phase hnuaia ṭanpuina dawng turte hnenah ṭanpuina an sem a, an hmalak dan tur an zirtir nghal. Ṭanpuina hi third phase-ah Rs. 38,245 leh rangva bundle li ṭheuh pek a ni a, fourth phase-ah Rs. 10,915 ṭheuh pek a ni. Training-ah maimaw pangang khawi dan, a in sak dan, chaw pek dan leh thingtheihmu enkawl dante an zir.

Damlo ngaihthah Pawizia inzirtir

Lawngtlai District Legal Services Authority chuan nimin khan Lairam Christian Medical Centre (LCMC)-a thawkte pualin Carolyn Hotel-ah ‘Damlote ngaihthah pawizia inzirtirna’ hun an buatsaih. He hunah hian Lawngtlaia chief judicial magistrate Laldinpuia Tlau-in ‘Medical negligence vis-a-vis Right to Health’ tih thupui a sawi a ni.

Hnam dangdawr lo turin ngen

Mizo Students’ Union (MSU) Gen.Hqrs. chuan, vawiin hian Central YMA Hall-ah ‘Zo hnam chhan ni’ an hmang dawn tih sawiin, he ni pual hian hnam dangte dawr lo tur-in Mizo mipui an ngen. MSU hian September thla Zirtawpni vawi hnihnaah 'Zo hnam chhan ni' an hmang
ṭhin a, kuminah hian hnam dang laka Mizote inhumhim dan tur leh chimrala an awm loh nana tih turte an zirho dawn a ni.

International Literacy Day

Lai Autonomous Dis-trict Council (LADC)-a Adult Edu-cation Wing leh School Education Directorate buatsaihin, nimin LADC Hall-ah Inter-national Literacy Day hman a ni a, LADC exe-cutive member C. Lal-neih-khuma'n a hmanpui.