Kolasib SP leh Hailakandi SP inkâwm Police-te thawhho dan tur an rel

Hailakandi SP PJ Goswami chuan, nimin khan Kolasib SP C Lalzahngoa chu a pisaah a tlawh a; Assam sorkar tharin an state depa awm state-te nen boruak ṭha tak neih a duh vanga tlawh a nih thu hrilhin, thawhho dan tur an rel.

Kolasib SP leh Hailakandi SP-te chuan, Assam leh Mizoram inrìna lai, Hailakandi district leh Kolasib district-te ralmuang taka awm mek chu vawn nun zel a nih theih nan harsatna a thlen thulha chinfel dan turte an dawi dun a; harsatna eng emaw thleng a awm chuan inhriattir tawn zung zung ni se, an ti.

SP pahnihte chuan, tun hma aṭanga ramri buaina awm ṭhin te, hel chungchangte leh misual hnu chhui kawnga thawhhona ṭha zawk a awm theihna turte an sawi dun a; misual hnu chhui kawngah hriat duh leh mamawh awm ang angahte inpuih tawn zel ṭha an ti a ni.

PJ Goswami chuan Assam sorkar-in ṭhenawm ramte nena inkungkaihna leh thawhhona ṭha neih a duh tih sawiin, "Mizoten Assam-ah buaina an tawh chang a awm thei a, chutiang bawkin Mizoramah Assam miten buaina an tawh chang a awm thei a, chung hunah chuan buaina tipunlun thei zawnga hma la mai loa, phone hmang emaw a inbe tawna theih ang anga buaina chinfel ṭhin ni se," a ti.

Kolasib SP chuan, Buhchang-phai Ramthar zaua kum 2014-a buaina thleng chungchang Hailakandi SP a hrilh a, "Ramria buaina tam zawk chu Assam Forest department-te hmalakna vang a ni," a ti. Kolasib SP thu-sawi chungchangah hian Hai-lakandi SP chuan, Assam Forest department hotute a lo sawipui tur thu a sawi.