Champhai SP-in NGO-te a kâwm

Champhai SP thar Brijendra Kumar Yadav chuan, nimin khan a pisaah Champhai district-a tlawm-ngai pawl hruaitute leh thuthar thehdarhtute a kâwm a; dan leh thu-pek kenkawh leh ram venhimna kawngah theih-tawp chhuah a inhuam thu a hrilh.

Champhai SP chuan, mipui, khawtlang hruaitu, thuthar thehdarhtute leh dan leh thupek ken-kawh kawnga police-in an thawhpuite nena thawh-hona ṭha tak neih a duh thu a sawi a, "Thawhhona ṭha a awm phawt chuan sualna chi hrang hrang thleng mek leh ramri kâna ruihhlo leh thil ṭha lo lut ṭhin dan kawngah nasa taka hmasawn a nih ngei ka beisei," a ti.

Brijendra Kumar Yadav chuan, Champhai district chu ramri hrûl-ah a awm avangin ruih-hlo luhká ber a nih bakah, dan leh thupek ken-kawh kawngah pawh harsatna tam tak a thlen ṭhin thu sawiin, "Sorkar leh khawtual mite nen theihtawp chhuah tlan a nih ṭhin vangin tun hnaiah dan bawhchhiatna leh sualna a tlahniam a ni," a ti a; hmeichhiate dinhmun chawikan leh zahsak chu thil pawimawh a nih thu a sawi.

Inkawmhonaah hian dan leh thu pek keng-kawhtute leh khawtlang hruaitute'n sualna hrang hrang do hna an thawh mek dante an sawi a, chak zawka kalpui chhunzawm dan tur sawiho nghal a ni.