Serchhipah dialysis khâwl dah kan tum - Chief Minister

Chief minister Lalduhoma chuan nimin khan a biala Serchhip District Hospital sak mek a tlawh a, Eco Savior Foundation kaltlanga hmuh District Hospital-a hman tur Samsung V6 Ultrasound khawl a hawng. CM chuan, Serchhip District Hospital sak zawh a nih hunah dialysis khâwl dah tum a nih thu a sawi.

CM Lalduhoma chuan, Serchhip District Hospital building thar tur sak meka harsatna awmte sukiang turin hma an lak zel thu a sawi a, "Serchhip damdawi-in hi kan theih ang angin kan thuam mek a, building thar kan neih hunah dialysis khawl rawn dah kan tum dawn," a ti.

Chief Minister chuan, damdawi-in chauh ni loin, Nursing School tur building sak tawh, tun thlenga la hman ṭangkai loh chu hman theiha siam an tum thu a sawi a; Serchhipah sorkar quarters sak belh nual a nih thu leh Circuit House pawh cheng nuai 600 sêngin sak tum a nih thu a sawi bawk.

Serchhip District Hospital-ah ultrasound khawl thar a awm theihna tura Eco Savior Foundation, Kolkata hmalaknaah a lawm thu sawiin Lalduhoma chuan, "CSR hi Companies Act dan hnuaia mi, sorkar sum séng loa hmasawnna hna tam tak thawh theihna hnar a ni. Mizorama NGO zingah thawhpui tur company an dap chak chuan Mizoram tan hlâwkna tam tak an hai lut dawn a ni," a ti.

Lalduhoma chuan, sorkarin CSR pawimawhzia an hriat avangin CM office-ah CSR Cell din a nih thu sawiin, "UNDP nena ṭang dunin Bangalore-ah CSR Conclave buatsaih a ni a, CSR pe ṭhin company lian ṭhahnem tak an zu kâwm a, Mizorama hetiang lama tui mite pawh ko khawmin awareness programme an buatsaih tawh," a ti a, conclave lian tham nei turin an inpuahchah leh mek thu a sawi.

Khawl thar Samsung V6 Ultrasound hi cheng nuai 49 man a ni a, a hawnna hawnna inkhawm hi Serchhip chief medical officer Dr LP Malsawma'n a kaihruai a ni.