Collection centre kalpui dan inzirtir

Hnahthial District Agricultural Marketing Committee hnuaia secondary collection centre pangaa manager leh accountant-te pualin nimin khan training buatsaih a ni a, Mizoram Agricultural Marketing Board coordinator Dr Malsawmdawngliana'n hmanpuiin, secondary collection centre kalpui dan leh ṭul dangte a zirtir.

Dr Malsawmdawngliana chuan, sorkarin a tiam tawh ang ngeiin sawhthing a lei ngei dawn thu a sawi a, "A bul ṭanna atan February 20, 2025 hian a lei ṭan dawn a, hemi aṭang hian thil kalphung ṭha zawk a chhuah ngei pawh beisei a ni. Tuna secondary collection centre-te hi ṭha tak leh dik taka kan kalpui theih a, a kalphungin duhthu a sam chuan sawhthing chauh ni lo, thlai thar chi hrang hrang hralhna atana thil tangkai tak tur a ni ang," a ti.

Hnahthial district-ah hian secondary collection centre panga - Chhipphir, Hnahthial, Tarpho, Darzo leh Cherhlun khuaahte awm. Data an lak khawm aṭanga a lan danin, Hnahthial district-ah hian sawhthing quintal 20,000 chuang hralh tur a awm beisei a ni.