Governor leh Sports Minister inkâwm

Governor Gen. Dr Vijay Kumar Singh leh Sports & Youth Services (SYS) minister Lalnghinglova Hmar chu nimin khan Raj Bhavan-ah an inkâwm a, Mizorama infiamna hmasawnna turte an sawi dun.

Larsap chuan, Mizoramin infiamna lama theihna a neih thu leh Mizoram chu football vanga a hmelhriat ṭhin thu sawiin, "Football piah lamah hian hmasawn theihna sang tak Mizoram hian a nei," a ti a; Union Sports Minister a biak tawh thu te, Mizoramin Vision Olympics 2036 a nei chu lawmawm a tih thu leh, sipai lamah pawh a ṭul anga thawhpui tur a zawn tur thute a sawi.

Lalnghinglova Hmar chuan, Mizoramin infiamna lama hma a laknaah sorkar flagship programme Bána Kaih hnuaiah Empowering Mizoram Sports kalpui a nih dawn thu sawiin, thingtlang hrût chhuaka infiamna lama theihna neite zawn chhuah dan tura ruahmannate Governor a hrilh.

Sports Minister chuan, infiamna lama Mizoram hmathlirte tihpuitlinna turah theihtawp chhuahpui turin Larsap a ngen a; a tawnhriat pawimawh leh hnathawh tawhnate chu Mizoramin a chhawr ṭangkai ngei a beisei thu a sawi.

LESDE leh Excise & Narcotics department enkawltu ni bawk Lalnghing-lova chuan, ruihhlo do kawngah infiamna a ṭangkai thu leh eizawnna a nih chhoh mek thu a sawi bawk.