KHAWTHLIR

Fiahna paltlang

Chakma Autonomous District Council (CADC)-a chief executive member (CEM) thar Molin Kumar Chakma-a'n thlawptu a ngah leh ngah loh nimin khan fiah a ni a, fiahna a paltlang. CADC session hall-a vote of confidence (floor test)-ah hian CEM atana January 31, 2025-a lak luh Molin Kumar Chakma hian thlawptu MDC 14 a nei a, thlawp lotu MDC pathum an awm a, MDC pahnih an tel lo a ni.

Dan zâwm lo tan tlang theih dawn loh

Commissioner of State Tax chuan hriattirna chhuahin, sumdawng leh mimal bungrua Mizoram páwn aṭanga dan loa lak luh tihtawp a nih theih nan April 1, 2025 aṭangin Vairengtea Taxation Data Collection Centre-ah tax invoice leh waybill dik tak nei lote kaltlang phal a nih dawn loh thu a tarlang a, "Dan zâwm lo chu dan anga hrem an ni ang," a ti.

VC House hawng

Minister of state Prof. Lalnilawma chuan nimin khan a bial chhunga Thingsul-Tlangnuam Village Council House a hawng. Minister chuan, kut hnathawktute tan sorkarin theihtawp a chhuah mek tih a sawi a, "Thlai thar pawh sorkarin ruahmanna felfai tak neiin lei tura chak taka kalpui mek a ni," a ti. VC House hi NH-54 kawng laih vanga NHIDCL Public Assets fund aṭanga sum dawn hmanga sak a ni.

Hotute ṭhukhawm

Minister Dr Vanlalthlana hoin nimin khan a department enkawl pali - School Education, Higher & Technical Education, Information & Public Relations leh Information Communication Technology-te tana din Consultative Committee an ṭhu a, hmachhawp leh harsatnate an sawiho. MLA pathum - Dr K Beichhua, Ramthanmawia leh Baryl Vanneihsangi Tlau te bakah, department palia secretary-te an tel a ni.

Lawmthu sawi

ZPM president Lalliansawta chuan nimina an party pisaa inkhawmah VC leh LC inthlana ZPM candidate-te duhsak taka vote-tute chungah an lawm thu a sawi a, "Kum 7 leka upa ZPM-in tun dinhmuna VC leh LC member ngah ber kan ni ta hi a lawmawm hle. SEC, MPF, party worker zawng zawng leh LC/VC-a tlingte nen pheikhai rual taka pên turin kan insáwm a ni," a ti.