Ramhmul damdawi zir chianna lehkhabua tihchhuah an rél

Mizoram State Medicinal Plants Board (SMPB) Executive Body chu an chairman Lalrinpuii, Health & Family Welfare minister kaihhruaiin nimin khan Secretariat conference hall-ah an ṭhu a; ramhmul damdawi zir chian leh chhinchiah (documented) tawhte lehkhabua chhuah an rél.

Ṭhukthawmah hian, SMPB leh MIzoram University-a research scholar-te ṭanghoin Mizoram district paruka ramhmul damdawi zir chian leh chhinchiah (documented) tawhte chu lehkhabua chhuah ni se, an ti a; ramhmul damdawi chungchanga zirchianna (Research & Development) nasa lehzuala kalpui te, Herbal Garden of State Importance project pawh tihlawhtling ngei tura hmalak chhunzawmte an rel bawk.

SMPB hi Ministry of AYUSH hnuaia National Medicinal Plants Board-in state tina ramhmul damdawi tichangtlung tura October 1, 2001-a a din a ni a, kum 2015 aṭang khan AYUSH department hnuaiah dah a ni.