Walk for Health walkathon huaihawt

Health & Family Welfare department hnuaia Mizoram Health Systems Strengthening Project (MHSSP) chuan natna inkai chhâwn theih lohte laka invenna leh inenkawl dan tur mipui zirtirna atan district hrang hrangah walkathon an huaihawt dawn a, bul ṭan nan February 15, 2025 khan Mamit district-a khaw pangaah huaihawt a ni.

MHSSP chuan natna inkai chhâwn theih loh (non communicable disease) - thisen sang, zunthlum, cancer, stroke leh lungphuchâwl laka inven dan tur leh inenkawl dan tur inzirtirna district paruka khaw 510-ah an kalpui mek a; hmalakna chi khat atan village level, district level leh state level-ah kea kal rûnpui, walkathon buatsaih a ni dawn a, thupui chu 'Walk for health' tih a ni.

Walk for Health walkathon hi February 15 khan Mamit district-a khaw panga - Chungtlang, Rulpuihlim, Ṭuahzawl, Bawrai (Zawlnuam) leh Damparengpuiahte huaihawt a ni a; mi 658 vel telin, kein an kal a ni.

Walkathon hi Aizawl East, Lunglei, Kolasib, Serchhip, Lawngtlai leh Mamit district-ahte February 15 aṭanga March 12, 2025 chhungin buatsaih tum a ni a; MHSSP chuan walkathon huaihawtna apianga khaw mipuite a tam thei ang ber tel turin an sáwm. Walkathon hi March 21, 2025-ah Aizawlah khàr a ni ang.