Police Computer Training Centre hawng

Lunglei High Powered Committee (HPC) vice chairman V Malsawmtluanga, MLA chuan nimin khan Mizoram Police leh National Institute of Electronics & Information Technology (NIELIT) ten Lunglei SP office-a computer zirna, Police Computer Training Centre an buatsaih a hawng.

Police Computer Training Centre atana thawhhona hi kum thum atan ruahman a ni a, kum khatnaah training chi hrang pali, darkar 106 chhung awh tur ruahman niin, mi 325 vel zirtir theih beisei a ni.

Training centre tan bik instructor lak tawh a ni a, vawiin aṭangin police batch khatna, mi 20-in ni thum awh training an ṭan ang a, kar lehah batch hnihna chhunzawm a ni ang. A remchan dan angin police bakah, sorkar hnathawk dangte tan pawh training buatsaih zel tum a ni.

V Malsawmtluanga chuan, khawvel changkang zelin thiamna thar a her chhuahpui milin upa zawkte pawh an inher rem ve zel a ṭul thu a sawi a, "A bikin police-te chu intuai thar reng a ṭul zual a, centre thar hi hna thawhna atana police-te mamawh thiamna neih belhna tur hmanraw ṭangkai tak a ni dawn," a ti.

Thiamna sang zelin sualna kawngka a hawng zau zel tih sawiin V Malsawmtluanga chuan, "Misual man chhuahna atan thiamna thar hman dan zir thiam ve zel a ṭul a, mipui himna leh ralmuanna atana thawktu police-te'n hmanrua leh thiamnaah a ṭha thei ang ber an neih a pawimawh," a ti. Lunglei police thuam chakna atana an mamawh leh rawtna an thlente chu HPC aṭang pawhin a theih ang anga an bawhzui tur thu a sawi bawk.