YMA group pahnihin tualthihnaa mawhphurtu chhui chhuah vat phût

YMA, Langkaih group leh Bungṭhuam branch chuan thuchhuah siamin, Lalfakmawia (59), Bungṭhuam tualthihnaa mawhphurtute a rang thei anga chhui chhuah an phût thu an tarlang.

Lalfakmawia thihna chu an ngai thutak hle tih tarlangin Langkaih Group YMA chuan, "He tualthihnaa mawhphurtute hi police-te'n a rang thei ang bera chhui chhuak a, an phu tâwk hremna an hmuh ngei kan ngenin kan phût. Police-te tha tichak tura tih theih kan nei a nih chuan kan inpeih reng a ni," an ti.

Langkaih Group YMA chuan, Tripura leh Assam ramria awm an nih avang leh an huam chhungah pawihkhawihna a thlen nawn fo tawh loh nan, police thuam chak turin Mizoram sorkar an ngen nghal a ni.

YMA, Bungṭhuam Branch chuan, Lalfakmawia tualthihnaa inhnamhnawihte a rang thei ang bera chhui chhuah an duh thu tarlangin, "Pawi khawihtute a na thei ang bera hrem kan phût," an ti a; Lalfakmawia tualthihna chungchangah thu belhchian dâwl lo thehdarh lo turin mipui an ngen.

Thu dawn danin, Lalfakmawia tualthihnaah hian Kanhmun Police Station-ah thubuai ziah luh a ni a, an chhui mek. Mi ṭhenkhat thu zawt fiah tawh mah se, nimin tlai thleng khan man an la nei lo. Lalfakmawia bike leh thawmhnaw bul vela hnam dang awmte pawh thu zawhfiah an ni.

Tarlan tawh angin, Lalfakmawia (59), Bung-ṭhuam hi February 13, 2025 khan Bungṭhuam leh Luimawi inkar luiah thia hmuh a ni a, sawisak hlum ni ngeia hriat a ni. February 13 vek khan Thinghlun panna kawngah a thawmhnaw dang leh a bike hmuh a ni bawk.

He thil thleng chungchangah hian Kanhmun PS-ah thubuai ziah luh a ni.