FCI kudam sawn kan duh - Chief Minister

Chief minister Lal Thanhawla chuan Mizoram sorkarin Ramrikawna FCI kudam chu Mizoram University-in an ngaimawh hma daihin an ngaimawh tawh tih a sawi.

Lal Thanhawla hian nimin khan Congress Bhavan-a inkhawmah thu sawiin, Ramrikawna FCI kudam chu an ngaimawh tawh
ṭhin a, sawn tumin hma an lak tawh ṭhin thu a sawi a, "FCI thu loin kan páwng tih mai thei lo a, khawtlang tan leh sorkar tan pawh a ṭha lo. A sawnna tur hi kan hotute'n an ngaituah reng," a ti.

Chief Minister chuan, MZU hotute leh a awmna khawtlang hotute duh dan hi hmân aṭanga kan duh dan a ni tawh tih a sawi a, "Tun maiah a kawng a awm lo a nih pawhin inpuhmawh nan hmang lo ila ka duh," a ti bawk.

FCI kudam chungchangah hian Land Revenue & Settlement minister R Romawia chuan, "FCI hian kudam sawnna hmun tur an zawng reng a, rêl kawng aṭanga hla lo tur an duh. Mualkhang ram an melh a, mahse Kolasib district a ni si a, district pakhata buhfai kudam pathum dah a theih loh an ti si. Nghalchawm ramah khuan an duh deuh an nei," a ti a; Sairanga rél luh theih hun turte ngaihtuah chungin, tun dinhmunah insawn a la buaithlak deuh niin a sawi.

MPCC president Lal Than-hawla chuan record siamin a zawnin term thum sorkarna an siam dawn nia sawiin, Mizorama a záwna term thum sorkarna siam hmasa an nih dawn thu tarlang.

MPCC President chuan, a záwnin term hnih an kal mek a, a záwnin term thum an sorkar dawn nia sawiin, "Kawmchhak hoin a theih loh, Mizoramah a la awm ngai lo, ti mah se, khawvela la awm ngai lo, remna leh muanna awm theih nana mahni sorkar namthlutute kan ni. Chu ai chuan term thum a záwna sorkar hi a awl zawk daih," a ti.

Congress party hotute chu emotional issue hmanga kaihhruai an ni ve lo tih sawiin Hawla chuan, "Naktuk naktipah kan inthlang dawn tawh si a, district pathum i siam belh ang, sikul i upgrade vak ang, IR battalion i din leh phawt ang ti mai mai an ni ve lo," a ti a; ram rorel chu vote hmuh nan ringawt a ni lo a, ram tan thil ṭha leh rotling, mipuite mamawh tihna tur a nih thu a sawi.

Lal Thanhawla chuan, NLUP vangin UNO aṭangin agency pali Mizoramah an lo kal tih sawiin, "Mizoramah an office an rawn hawng ringawt pawh hi a ropui hle, party dang tih chu ni se an aupui nasa viau ang," a ti a; NLUP-a hlawhtling tawhte pawh an hlawhtlin leh zual theih nan chhawmdawl an la ngaih avangin NEDP duan a nih thu a sawi bawk.