Bawlhhlawh sâwngbâwl dan tur sawiho

Aizawl Municipal Corporation (AMC) councillor-te chuan, nimin khan AMC pisa conference hall-ah Aizawl khawpuia bawlhhlawh paih leh sawngbawl dan ṭha zawk a awm theih dan tur an ngaihtuah a; Aizawl mayor PC Lalhmingthanga'n kaihruaiin, councillor-te an kal ṭha hle.

He hunah hian PHE superintending engineer Lalrotluanga leh executive engineer Helen Rodingliani ten bawlhhlawh sawngbâwl dan an sawifiah a; Aizawl bawlhhlawhte Tuiriala paihna kalphung tihṭhat dan tur te, bawlhhlawh paihna mual hran siam chung-changte leh bawlhhlawh sawngbawl ṭha nia an ngaihte an sawiho a ni.

Sawihonaah, Japan leh ram dang thiamnate Aizawla hman ve nghal theihte chu en zui nghal ni se, an ti a; AMC-in Aizawl khawpui bawlhhlawh leh a sawngbawlnaah theihtawp an chhuah zel tur thu an sawi.

AMC hian Aizawla bawlhhlawh lâk khawm leh sawngbawl hna a enkawl mek a; tun hnaia Board of Councillors meeting chuan bawlhhlawh sawngbawl dan buaipui tur bik Special Committee on Sanitation, Soid Waste and Dumping Ground a din bakah, tun hnaiah vek councillor pali chu Delhi-ah bawlhhlawh leh hriselna chungchang sawihonaah an tel a ni.