Eye Donation Fortnight hawn a ni

Nimin khan Aizawl Civil Hospital (ACH) conference hall-ah Health minister Lal Thanzara'n Eye Donation Fortnight vawi 31-na a hawng. Minister chuan, thih hnua mi dangte tan malsawmna ni a, mitdelte'n khaw êng an hmuh leh theih nana mit pe turin Mizo mipuite a sáwm.

Health Minister chuan, thih hnua mite tana malsawmna nih tum turin Mizo mipuite a chah a, "Mizo mipuite mit donate turin ka ngen a, mit pek hi Pathianin kan thih hnua mi dang tana malsawmna nih theihna kawng min hawnsak a ni tih i hria ang u," a ti.

Lal Thanzara chuan, mit nautê (cornea) lei tur a awm lo tih sawiin, "Mit vêka thlak a ngai a, sumin a lei thei lo a, petu an awm chauhin mitdelte'n mitvar an nei thei a ni. Thih hnua malsawmna nih duh mi tam tak an awm hi a ropui hle," a ti a; Mizo zinga mitthi tawh, mit petute'n an mit an pek zinga tlem azáwng chu phai lamah pek thlâk ve a ni a, Mizote hmangin hnam dangte mit pawh a vàr phah thu a sawi.

Minister Lal Thanzara chuan, August 31, 2016-a a hnena Governor Lt.Gen. Nirbhay Sharma-a'n lehkha a thawnah, Mizote zingah thih hnua mit pek tuma intiam mi tam tak an awm leh mit pe tawh tam tak an awm chu lawmawm a tih thu a ziak tih a sawi a, "Mit petu nih a ropui thu a sawi a, hemi kawnga hmalakna chhunzawm zel turin min chah a ni," a ti.

Health Minister sawi danin, July 31, 2008-a Aizawl Civil Hospital-ah Eye Bank hawn a nih aṭanga September 2016 thla tìr lam thleng khan thih hnua mit pe tura intiam tawh mi 4,349 awmin, mi 256-in mit an pe tawh a; mit thlak ngai inziak lut mi 277 an awm a, mit thlak hmasak ber chu September 25, 2008-ah tih a ni.

ACH Eye Bank-a SPO Dr Lal-remmawii sawi danin, Lawngtlai tih loh district hospital tinah eye ward leh operation theatre dah a ni tawh a, mahse, surgeon an tam loh avangin Aizawl leh Lunglei Civil Hospital-te chiah mumal takin an kal thei a ni.

Chawlhkar hnih chhung hman tur Eye Donation Fortnight hawnnaah hian thih hnua mit pe tawhte hnenah chawimawina leh hriatrengna hlân a ni a, an chhungte'n an dawnsak.