KHAWTHLIR

Pawna inthiar khap

Larsap chuan thupek chhuahin, Mizoram Municipalities Act 2007 (amendment 2009) Section 164 leh Mizoram Town Sanitation Rules, 1980-a Rule 8 leh 22 tlawhchhanin, Mizoram chhunga khawpui zawng zawngah páwna inthiar a khap. Ek-in ni lo, hmun danga inthiar hmuh a nih chuan dan anga hrem tur an ni.

Thisen pe

Chhingchhip Students' Union chuan, nimin khan Chhingchhip Venglaia Darpawngi Rûnah blood donation camp an huaihawt a, mipa 41 leh hmeichhia 14 ten Serchhip District Hospital tan thisen unit 55 an pe.

LPK chesualah thi

Nimin chhun khan Lunglei district-a Thiltlang dáiah LPK truck chesualin, kawng thlangah a lum a; Moses Lalhriatpuia s/o Helen Zamliani, Zarkawt a thi a, mi dang pahnih an hliam. Truck chetsual chhan hi a steering a ṭhat loh vang nia sawi a ni.

Taxi tlan dan

Traffic SP chuan thupek chhuahin, sorkarin September 12, 2016 chawlh chu a tuk September 13, Thawhlehni-ah thlak mah se, taxi intlân chhâwk dan tura ruahmanna siam sa chu kaltlangpui tur a nih thu a tarlang a, "September 12-ah vai tlan tur a ni a, September 13-ah intlân chhâwk tur a ni," a ti.

Kraws kawngzawh

Roman Catholic koh­hrante chuan, kum 2016 Year of Mercy-a puan pualin nimin khan Khawruhliana Kalvari Tlangah Kraws kawngzawh an nei a, Mizoram hmun hrang hrang aṭangin Catholic kohhran mi ṭhahnem tak an tel.

Inkhawmpui

Presbyterian Kohhrana pastor bial hrang hrangte chuan, naktuk Pathianni hian naupang sunday school inkhawmpui an hmang dawn. Beginners, Primary, Junior, Sacrament & Intermediate-te an tel dawn a; naupangte chu Pathian thu cháng leh thu inchhangte sawi rualin, fakna hla an sa dawn a ni.

Thiin chhar

September 8, 2016 tlai dar 6:30 vel khan Rang-vamual thlen hmaa Four Lane tia hriatah Lal-thansanga (58), Hunthar Veng thiin chhar a ni. Police-te sawi danin, Lal-thansanga hi motor chîl hlum nia rin a ni a, a lu leh a áwm báwrah motor chìlna hnûhmá a awm a, a chiltu erawh hriat a ni lo.

'Zo hnam chhan ní' hman a ni

Mizo Students' Union (MSU) chuan nimin khan Central YMA Hall-ah 'Zo hnam chhan ni' an hmang a, zirlai kal khawm ṭha-hnem takin hnam dang nupui/pasal nei lo turin an intiamna thu an ziak. MSU president PC Lalrinhlua chuan, sum-dawnna vangin khaw-velah hnam tam tak chîm-ral an ni tawh nia sawiin, "Keini Mizote chuan kan thlentir ve thiang lo. Kan bul lawkah inzirna tur an awm reng laia inzir nacháng kan hre lo a nih chuan kan fing lo hle tihna a ni ang," a ti.