Ruihhlo dona atan CYMA hnenah Home Minister-in Rs.15,00,000 a hlan

Home minister R Lalzirliana chuan, nimin khan a pisaah ruihhlo dona atana hman turin sorkar aṭanga ṭanpuina Rs. 14,00,000 chu Central YMA hnenah a hlân.

Home Minister chuan, "Ram tana harsatna lian ber ni chho mai tawh ruihhlo hluar lutuk vanga mimal leh chhungkuaah harsatna tâwk an awm belh zel a, state dangin ziaawm lam an pan laiin, hri ṭha lo HIV leh AIDS vei lamah pun lam kan pan zel. Hemi tiziaawm tura Police, Excise & Narcotics leh YMA-ten thawkhoa hmalak a ni hi thil lawmawm a ni a, rah ṭha chhuah ngei tur thil a ni," a ti.

R Lalzirliana chuan, ruihhlo chu sorkar pawhin buaipui tham a ni tih a hriat avangin, hun leh thâ hlu tak senga ruihhlo vâia che chhuak ṭhin YMA hmalakna chu fakawm leh puih tlak a ni tih hriain, an hman ṭangkai tura cheng nuai 30 dah hran a nih thu a sawi a, "Vawiina cheng nuai 15 pek an nih bak la awm pawh a ṭul anga pek chhuah zel tur a ni," tiin, CYMA hnuaia ruihhlo dotu SRS-te hnathawh chu ṭha a tih thu a sawi.

Central YMA hruaitute chuan, sorkar-in ṭanpuina sum a pe chu lawmawm an tih thu an sawi a, "Awmze nei leh
ṭangkai taka hman a ni ngei ang. Pawisa hi Aizawl chhunga YMA branch 98 leh group pasarih bakah, district-a sub-headquarters-ahte leh joint action-ahte sem darh a ni ang," an ti.

CYMA hnena ruihhlo dona tur sum hlannaah hian Law & Judicial minister Lalsawta leh Sports & Youth Services minister Zo-dintluanga te pawh an tel a ni.