Mumbai-a Navy Recruitment neihnaah innekbuai

Malad, Mumbai-a INS Hamla pawn lamah Navy sipai lakna tura tel tumte an inpawngnek a, mi eng emaw zatin hliam an tuar.

Navy recruitment drive-ah hian candidate 4,000 vel inlan tura beisei a nih laiin, candidate 6,000 vel an kal a, kalkhawm hi an tam tak em avangin an innekbuai zui ta a ni. Police leh Navy official-te chuan rei vak loah mipui innekbuaite hi an thunun thei a, recruitment drive pawh tluang taka neih chhunzawm a ni.

Navy chuan thuchhuah siamin, Malad-a Senior Secondary Recruit an neih chu an beise aia diltu an tam thu a sawi a, zing lamah innekbuaina awm mah se a hnuah boruak ṭha tak hnuaia recruitment drive neih chhunzawm a ni tih a sawi. Police-te chuan mipui thunun nan kut an thlak nia sawi chu thu dik lo a nih thu an sawi bawk.

Recruitment drive neihnaa telte chuan diltu an tam tak vangin chawpchilh takin dil thei chin chu mark 50%
aṭangin 60% ah tihsan a ni a, hei vang hian an lungawi lo hle tih an sawi.