World Suicide Prevention Day hmang Mizoramah kum tin mi 70 vel intihlum

National Mental Health Programme leh Kulikawn Hospital-a Psychiatry department bultumin, Inrinni khan IPR Auditorium-ah mahni intihhlum vênna ni, World Suicide Prevention Day hman a ni. Mizoramah kum ruk chhungin kum tin mi 70 vel anmahni an intihlum anga chhût a nih thu an tarlang.

Inkhawma khuallian, Health minister Lal Thanzara chuan, thiamna sang zelah awlsam takin inbiakpawhna lamah ramin hma sawn mah se, chu chuan rilru inpawh tawn taka inkawmna lam a tihniam hle niin a sawi a, "Inngaihsak lohna a thlen avangin chhungkua leh ṭhian ho pawhin a huhoa inpawh tawn taka hun hman ho chin thar leh a ṭul," a ti.

Lal Thanzara chuan, mahni nunna lak duhna thinlung neite pui thei turin Mizo tlawmngaihna chu inlaichinna hrang hrangah lan chhuahtir ṭhin ni se a duh thu sawiin, chu chuan kawng tam takin hetiang harsatna neite chhanchhuah kawngah nasa takin a pui thei dawn tih a sawi.

Inkhawm hi Psychiatry department HoD Dr C Lalhrekima'n a kaihruai a; Health principal director Dr K Ropari pawhin thu a sawi.

Psychiatrist Dr Ruth Lalmuanpuii leh Dr Lalengmawii-te sawi danin, mahni intihhlum tum mi 56 dinhmun an zir chian aṭangin, depression vanga mahni nunna lak tum 30.4% an awm a, chu'ng zingah chuan zu leh ruihhlo dang ti an tam zawk.

Kum 30 chung lamah zuin a tihbuai vanga mahni nunna lak tum an tam a, kum 30 hnuai lamah heroin leh ruihhlo dang hman sual vanga buai leh mahni nunna lak tum an tam zawk thung.

WHO chhinchhiah danin, khawvelah kum tin mahni intihlum mi 8,00,000 chuang an awm a, India ramah mi 1,45,000 chuang leh Mizoramah kum ruk chhungin kum tin mi 70 vel mahni intihlum anga chhût a ni bawk.

Kum 2003 aṭang khan International Association for Suicide Prevention leh World Health Organization ṭangkawpin World Suicide Prevention Day an hmang ṭan a; kumina thupui chu 'Connect, communicate, care' tih a ni.

World Suicide Prevention Day hi Cham-phaiah pawh IPR Auditorium-ah Champhai district-a Mental Health Programme (MHP) leh Mission Foundation Movement (MFM)
ṭangkawp huaihawtin hman a ni a; Champhai IPRO Neng Thianlala khuallian niin, chanchinbu mite leh veng hrang hranga YMA chanchinbu enkawltute an tel.

Champhaiah hian mahni kutzála thite sûnna leh an chhungte tawrhpuina entir nan mombati chhit a ni. Champhai district-a MHP hian awareness campaign leh free clinic-te an buatsaih ṭhin a; February 2015 aṭanga July 2016 thleng khan mi 298 an enkawl tawh a ni.

Lungleiah chuan Civil Hospital OPD lounge-ah hman a ni a, Lunglei DC Abhijit Vijay Chaudhary-a'n a hmanpui. Inkhawm hi Lunglei CMO Dr VLMS Dawngliana'n a kaihruai a, DC bakah, Lunglei Civil Hospital medical superintendent Dr Lalsanga ten thu an sawi.