Pawl 6 zirna English medium-a let turin SCERT-in zirlaibu an buaipui mek

Academic session thar, 2017-18 aṭangin Mizo--ram sorkar sikulah pawl 6 zirlaite sap ṭawngin lehkha zirtir an ni dawn a, zirlaibu turte State Council of Educational Research and Training (SCERT)-in an buaipui mek.

Mizoram sorkarin pawl 6 zirlaite kum thar aṭanga English-a leh-kha zirtir a tumnaah hian School Education depart-ment chuan hriat-tirna (notification) a tichhuak tawh a; a hun taka ṭan tumin an inbuatsaih.

Vanglaini palai zawh-na chhangin SCERT director Laldawngliani Chawngthu chuan, pawl 6 zirlai English medium-a leh chu Mizoram Educa-tion Reforms Commission rawtna a nih thu a sawi a, "Middle school zirtir-tu pawlte pawhin an inkhawm-puiah an pass tawh a, New Education Policy buaipui mekah pawh rawt a ni," a ti.

Laldawngliani sawi danin, tun hma deuhah chuan Mizoram sorkar hnuaia zirlaibuah pawl 8 aṭangin English hman a ni a, kum 2012-13 aṭang khan pawl 7 zirlaibuah English hman ṭan niin, kum 2017-18 aṭangin English textbook chu pawl 6-ah hman ṭan a ni ve leh dawn ta a ni.

SCERT Director chuan, New Education Policy duan mekah pawl 5 chu primary school-ah behtir rawt a nih thu sawiin, "Pawl 6-8 te middle school-ah awmin, high school-ah pawl 9-10 te awm tura tih a ni," a ti a; primary school chu tualchhung ṭawng hmanga zirtir tur niin, middle school aṭangin English medium-a kalpui tum a nih thu a sawi.

New Education Policy chu buaipui mek a ni a, Mizoramah pawh district level leh state level-ah sawiho a ni tawh a, an rawtnate pawh Central-ah an thawn a ni tawh.Tunah hian pawl 1-5 ten NCERT syllabus an hmang mek a, kum 2017-18 aṭangin pawl 6-8 ah pawh NCERT syllabus hman tur a nih thu a sawi bawk.