KHAWTHLIR
Thisen pe
Inrinni khan LIKBK Thalai Pawl, Lawngtlai College Veng bialte'n Lawngtlai District Hospital-ah thisen unit 40 an pe a, a petute mipa 33 leh hmeichhia pasarih an ni. Zomi Baptist Youth Fellowship, Champhai member mipa 28 leh hmeichhia 10-in Champhai District Hospital unit 38 an pe a; Tuithiang branch YMA-in an rising day lawm nan Aizawl Civil Hospital tan unit 30 an pe a, a petute mipa 26 leh hmeichhia pali an ni. Tlangnuam branch KṬP-in an diamond jubilee pualin Synod Hospital tan unit 29 an pe bawk a, a petute mipa 27 leh hmeichhia pahnih an ni.
Kum 100 lawmna rimawi intihsiak
Salvation Army chuan kum 2017-a India Eastern Territory kum 100-na, centenary thleng tur lawmna pakhat atan Inrinni khan Territorial Headquarters-a Booth Mansion Conference Hall-ah Centennial Timbrel Competition an buatsaih a, chief secretary Lt.Col. Davidson Varghese-a'n a hawng.
Lok Adalat
Kolasib district Lok Adalat chu Inrinni khan Kolasib District Court-ah an ṭhu a; thubuai 46 an ngaihtuah zinga panga an titawp. Lok Adalat-ah hian leiba ṭhìnna
aṭangin Rs. 37,000 an hmu chhuak a ni.
BCM upa exam
Baptist Church of Mizoram (BCM) Upa Exam Board chuan September 9, 2016 khan Serkawna Sap Upa leh Pu Buanga Hall-ah kohhran upa exam result an tichhuak. Exam-ah hian kohhran upa atana tualchhung kohhranin an thlan mi 143 zinga pathum an exam thei lo a, mi 140 exam-in, an pass vek a ni. Upa exam pass-te hi October 30, 2016-ah an awmna ABC ṭheuhah nemngheh an ni ang.
Tui pump-na pe
World Vision India, Chhimtuipui ADP chuan an khaw enkawl zinga khaw hnih - Ngengpuikai leh Khawmawi-a lo leh huan neitute hman atan tui pump-na khawl 30 tun hnai khan an pe.