GP fund-ah garrage ngaih pawimawh a ni dawn

Sorkar hnathawk, an General Provident (GP) Fund dah lâk chhuah kawngah motor dahna (garage) sak tumte ngaih pawimawh hmasak a nih tawh tur thu Finance minister Lalsawta chuan Vanglaini a hrilh.

Finance Minister chuan, Mizoram sorkar sum mil zela GP Fund pek chhuah mekah, medical leh zirna atana dilte chu ngaih pawimawh hmasak an nih thu sawiin, "Hei bakah hian Aizawl khawpui inrelbawlna kawngah, kawngpui a thâwl theih nan sorkarin ngaihtuahna thui tak, long term policy a nei. Hmalakna hmasaah an mimal motor emaw, mi dang luah theih tura an rama garage sa duhte tan GPF lak chhuah pawh theihtawpa phalrai a ni," a ti a; garrage sa duh sorkar hnathawkte'n GPF an lak chhuah theih nan October 1, 2016 aṭanga November 2017 thleng hun hawn a nih tur thu a sawi.

Public transport tihchangtlun nan kum nga atan long term policy, kum 30 lo kal leh tur atan pawha rintlak ruahman tum a nih thu sawiin Lalsawta chuan, "Hemi chungchangah hian sorkar chu tihngaihna hre loa êkcheh ṭhut mai mai angin a ṭhu dawn lo. Mimalin motor an neih kher ngai loa public transport system hi changtlung zawka ruahman a ni," a ti.

Kawngpui lûn lai zím lutuk pawh sorkarin a ngaih pawimawh thu sawiin, Finance Minister chuan, "Venghlui leh Republic Venga kawng pêngṭhuam, Pangi Péng pawh tihzauh thuai a ni dawn a, sum pawh a awm vek tawh. PWD, UDPA leh traffic police-te nen ṭangkawpa hmalak a ni ang," a ti a; Upper Bazar-a Aizawl Solice Station hnuai, Millennium Centre chhak kawngpui pawh râwt hniam a, lirthei kal vel tana awlsam leh nuam zawka siam a nih tur thu a sawi bawk.