Land record tihchangtlunna tur hawng; Hmanraw pawimawh a ni dawn - LRS Minister

Land Revenue & Settlement (LRS) minister B Lalchhanzova chuan nimin khan Irrigation & Water Resources auditorium-ah land record tihchangtlunna tur National Geospatial Knowledge-Based Land Survey of Urban Habitations (NAKSHA) a hawng a; NAKSHA chu hmanraw pawimawh tak a nih dawn thu a sawi.

NAKSHA hi Ministry of Rural Development hnuaia Department of Land Resources in Central Sector Scheme kal mek DILRMP hnuaia programme thar a ni a; India rama khawpui 153 chu pilot project atan thlan niin, chung zingah chuan Aizawl South bial huam chhung chu Mizoram aṭanga thlan zingah a tel.

LRS Minister chuan, NAKSHA chuan khawpui land record tihchantlun chu a tum ber a nih thu sawiin, "Aizawl South area chu oblique angle camera leh LiDAR sensor-te hmangin drone emaw, helicopter emaw aṭanga thla lak a nih hnuah 3D map teh theih siam chhuah a ni dawn. Chu chu leilungah finfiahna neih leh vek a ni ang a, chumi hnuah final map siam a ni ang," a ti.

Map chu 3D a nih dawn avangin ram pass zawng zawng chhinchhiah a nih bakah, ram chhunga awm inte pawh teh theihin a awm vek dawn tih sawiin B Lalchhanzova chuan, "Hei hi Revenue department mai bakah UDPA, AMC leh Disaster Management Rehabilitation department tan hmanraw ṭangkai tak a ni dawn," a ti a, khawpui ruahmanna (planning) atan pawh a pawimawh tur thu a sawi.

Revenue Minister chuan, NAKSHA a hlawhtlin theih nan LRS department, UDPA department, Aizawl Municipal COrporation, local council leh NGO-te chu a neitu an nih angin theihtawp chhuaha thawkho turin a chah a; Aizawl South chhunga veng 43-a khawtlang leh tlawmngai pawl hruaitute chu theihtawp chhuaha department thâ tichak turin a sáwm bawk.

NAKSHA hawnna hi India ram pumah a ruala hman a ni a, Union RD minister Shivraj Singh Chouhan chuan Raisen, Madhya Pradesh-ah a tlangzarh a ni.