KHAWTHLIR

Thisen pe

Regional Institute of Paramedical & Nursing Sciences (RIPANS) chuan nimin khan an hmunah thisen pek an huaihawt a; zirlaite leh thawktute'n Civil Hospital, Aizawl tan thisen unit 100 an pe a, petute mipa 50 leh hmeichhia 50 an ni.

AR-in meth man

Assam Rifles sipaite chuan February 17, Thawhṭanni khan Zokhawtharah methamphetamine kg. 9.298 an man a, Zokhawthar Police Station-ah an hlan. Meth kengtu Myanmar lam mi pahnih - Lalthangvela (28) s/o Hrangthanzema leh Zaithangpuia (26) s/o Raldothanga, Khawmawi ve ve an man nghal bawk.

PM-MKSSY camp

Fisheries department, National Fisheries Development Board leh common service centre (CSC)-te chuan nimin khan Zawlnuam College multipurpose hall-ah 'Application Mobilization Camp under Pradhan Mantri Matsya Kisan Samridhi Sah-Yojana' (PM-MKSSY) an buatsaih. He hunah hian sangha kaihhnawiha eizawng mi 180 an tel a, PM-MKSSY chungchang leh registration tih pawimawhna te, scheme hnuaia hamṭhatna dawn theih hrang hrangte hrilhfiah an ni.

Tomato sawngbawl

KVK, Khawzawl leh SIRD, Thingsulthliah chuan nimin khan Neihdawn khuaa tomato chingtu mi 63 pualin tomato sâwngbàwl dan inzirtirna an buatsaih. Neihdawn khuaah hian chhungkua 140 vel an awm a, Tomato Grower Society member 111 an awm; kum 2024 khan tomato quintal 2,500 an thar a ni.

Skill Committee ṭhu

Siaha District Skill Com-mittee chu an chairman VL Hruaizela Khiangte, district bawrhsap hoin nimin khan an ṭhukhawm a; Industrial Training Institute leh zirna-in danga zirchhuakte an dinchhuah theihna tura awlsam zawka loan an hmuh theih nan ruahmanna siam leh district-a hlawhtlinpui theih tur trade thlan thiam a ṭul thute tarlan a ni.