Best Field Functionaries Award sem

Women & Child Development department chuan nimin khan Taxation Auditorium-ah hna thawk ṭha chawimawina, Best Field Functionaries Award an sem a, Social Welfare, Tribal Affairs, Women & Child Development minister Lalrinpuii'n a hmanpui.

Inkhawmah hian minister Lalrinpuii'n chawimawina dawngtute hnenah a hlan a; Lalchhandami, Tlangnuam Anganwadi Centre-III chu Best Anganwadi Worker leh Best Anganwadi Helper atan thlan a ni.

Minister Lalrinpuii chuan, ICDS (Integrated Child Development Scheme) chu Mizoramin kum 1972-ah a hmelhriat ṭan a, East Lungdarah bul ṭanin, tunah chuan Mizoram a tuam chhuak tawh tih a sawi a, "Kum 53 chhung zet hmasawn záwnga a ṭhan theih chhan pawimawh tak chu field functionary-te an ni," a ti.

Anganwadi centre tilâr thiam a ngai thu sawiin Lalrinpuii chuan, "Kan tihchangtlun zel a, khawtlang pawhin a pawimawhna hria a, a neitu rilru an put zel a ngai. Chu chuan kan hnathawh hrang hrangah hma min sawn zualtir dawn a ni," a ti a; thawktute chu an hnate rawngbawlna a ni tih hriaa taima taka thawk zel turin a fuih.

SWTA Minister chuan, department pakhatah hna leh thawktu chi hrang hrang an awm thu sawiin Lalrinpuii chuan, "Kan pawimawh vek rualin, a rawng kan bàwlsak mipui nghênga awmte hian danglamna tak tak an thlen rang ber a, ruahmanna leh hmasawnna kailâwna pawimawh tak, a mamawhte hnena thil ṭha thlentu tak tak an ni," a ti.

Award semna hun hi Social Welfare & Tribal Affairs secretary Lalzarmawii'n a kaihruai a, WCD director Zoramthangi Chhangte-in POSHAN 2.0 hnuaia hmalaknate thlir letna hun a hmang.