Project Tuihna-Dam Khawchhuahna

Rural Development department leh North East Initiative Develop-ment Agency (NEIDA) chuan nimin khan RD minister Prof. Lalnilawma pisaah RD department hnuaia tuihna siam thar lehna (springshed development) 'Project Tuihna-Dam khawchhuahna' atan thawhhona thuthlung, memorandum of understanding (MoU) an ziak.

MoU hi kum khat atana ziah niin, a ṭul anga pawhsei theih tura ruahman a ni a; RD department aiawhin secretary R Zarzosanga leh NEIDA aiawhin state program coordinator Lalrinkima Bawite ten hming an ziak a ni.

RD Minister Prof. Lalnilawma chuan, tuihna a kiam nasat tawh thu sawiin, "January 2024-ah Tlawng lui chu MLD 171.5 a nih laiin, kumin January-ah chuan MLD 104 a ni. Kan lui tui leh a hnárte humhalh a, tuihna tipung zawnga ṭan lak a ṭul tak zet," a ti a, tuihna humhalh kawngah mi tin an pawimawh thu a sawi.

'Project Tuihna-Dam khawchhuahna' hmang hian Mizorama lui tui, ei leh in atana hman zawng zawngah hmalak tum a ni. Chumi atana springshed development hnathawh dan tur ruahmanna ground survey leh detail technical report (DTR)-te chu NEIDA-in an kalpui dawn a, ruahmanna siam angin WDC-PMKSY 2.0 lch MGNREGS hmangin hna an thawk ang. Department dang pawh a ṭul leh mamawh ang zela thawhpui tur a ni.

Ruahmanna hmasaah chuan Tlawng lui tinzawn a ni a, Tlawng hnar aṭanga hrût thlain Tlawng châwmtu luite leh tuihna siam thar lehna tur ruahmanna siam a ni. Aizawl, Lunglei, Serchhip leh Mamit district huam chhunga khaw 42-ahte zirchianna neih tawh a ni a, a tahtawlin hmun dangah pawh zirchianna kalpui zel tum a ni bawk.