Thla 14 chhungin Lunglei district-a lirtheia chetsualnaah mi 14 an thi

Lunglei district-ah January 2024 aṭanga February 2025 thleng khan lirtheia chetsualna ṭum 16 a thleng tawh a, mi 14 an thi. Lirtheia chetsualnaah hian four wheeler hmanga chetsualna 10 awmin, a tam ber.

Nimina Lungleia Road Safety Month puala hun hmannaa tarlan danin, January 2024 aṭanga February 2025 thlengin Lunglei district-ah lirtheia chetsualna ṭum 16 a thleng a, chu'ngah chuan mi 14 an thi a, mi 18 an hliam. Lirthei chesualte chu four wheeler 10, two wheeler paruk leh three wheeler pahnih a ni.

Nikum chhung vek khan Lunglei district-ah traffic dan bawhchhia mi 1,557 man an ni a, two wheeler 1,003, four wheeler 461 leh three wheeler 93 khalhtute an ni. Dan bawhchhetute pawisa chawi tling khawm chu Rs 19,51,700 a tling.

Lunglei police-te'n lirthei khu chhuahna siam danglam (modified exhaust) an man sate court phalnain ṭum hnih an tichhe tawh. Tun dinhmunah modified exhaust 70 vel tihchhiat tawh a ni a, man sa la tihchhiat loh 10 vel a la awm.

Nikum chhung khan Lunglei district-ah lirthei kaihhnawih dan bawhchhiat vangin mi 426 man an ni a, Rs 6,95,000 chawitir an ni. India Road Assessment Programme (IndiaRAP) portal-a chhinchhiah chinah lirtheia chetsualna ṭum 40 leh IndiaRAP portal-a chhinchhiah bakah ṭum 18 a thleng anga chhinchhiah a ni bawk.

Lunglei Venglai Traffic Point-ah additional DC Rochuangkimi Khenglawt hoin nimin zing khan Road Safety Month pualin hun hman a ni a, Lunglei DTO hnuaia SIS H Lalramchhana'n a kaihruai. Rochuangkimi chuan, lirthei khalh leh hman chungchangah fimkhur leh dan zawm pawimawhzia hre thar turin mipui a chah.

Road Safety Month puala hun hmanah hian sorkar official-te bakah Lungleia lirthei neitu leh khalhtu pawl hrang hrang aiawh leh Lunglei MJA member-te an tel a; thutiam (road safety pledge) sawi rual a ni.