PMEGP Awarness Campaign buatsaih

Nimin khan Govt. Kolasib College auditorium-ah Prime Minister's Employment Generation Programme (PMEGP) Awareness Campaign buatsaih a ni a, Kolasib DC Robert C Lalhmangaiha'n a hmanpui.

Campaign hi Khadi & Village Industries Commission (KVIC) leh Entrepreneurship & Knowledge Cell of Government Kolasib College-te buatsaih niin, PMEGP hnuaia sorkarin mipuite tana hmachhawp a neih leh hamṭhatna awmte inzirtirna hun atan hman a ni.

Robert C Lalhmangaiha chuan sorkar laipui chuan India ram mipuite an thiamna leh theihna ṭangkai taka an hman a, eizawnna ṭha tak neih tir chu a tum a nih thu sawiin, "He PMEGP scheme pawh hi chumi rilru pu chunga duan a ni. Sorkar hna in mi zawng zawng a daih lo, mahni hnathawh kawnga intodelhna hi ram hmasawnna kawng a ni," a ti.

Sorkar pawhin mipuite an intodelh theihna turin kawng hrang hranga a thawk tih sawiin Kolasib DC chuan, "Hemi kawngah hian mipuite tanpui turin a in hawn reng. Mimal intodelhna hna bakah midangte tana hnathawh tur siamsak chu he PMEGP scheme hian a kawh tum a ni," a ti a, midangte hrilhhria a kawhhmuhtu ni zel turin he huna kalkhawmte a fuih.

KVIC executive Nilimesh Sarkar chuan PMEGP sawizauna leh he scheme hnuaia inkaihhruaina awmte a lem nen a sawifiah.