IASE golden jubilee lawm a ni

Institute of Advanced Studies in Education (IASE) chuan nimin khan an auditorium-ah golden jubilee an lawm a; Higher & Technical Education minister Dr Vanlalthlana'n hmanpuiin, IASE hnuaia Digital Content Creation Centre leh Digital Library a hawng.

Dr Vanlalthlana chuan, IASE chu sorkarin tihhmasawn zel a tum thu sawiin, "Ram leh hnam siam kawnga a thawh hlâwk thei ber zinga mi, zirtirtu chher chhuahna hmun a nih angin IASE hi zirna-in pawimawh tak a ni," a ti.

HTE Minister chuan, "IASE-a zirlaite hian zirtirtu in nih hunah zirlaite tana entawn tlak leh ngaihsanawm tak nih tum u la, in zirlaite thinlungah thil chîk peihna (critical thinking) tuh tum ṭhin ang che u," a ti a; ram leh hnam siamṭhatna turah sorkar thawhpui zel turin a sáwm.

Golden jubilee lawmna inkhawm hi HTE secretary H Lalengmawia'n a kaihruai a, IASE principal Prof. Lallianzuali Fanai pawhin thu a sawi. IASE-a thawk tawh ṭhinte chawimawina hun hman a ni bawk.

IASE hi kum 1975 khan Mizoram Institute of Education tia din a ni a, a hnuah College of Teacher Education tih a ni. Kum 2012 khan IASE-ah hlan kai leh a ni a, kum 2016 thleng khan Mizorama B.Ed. zirna awm chhun a ni.