Bawng vulhtute hnenah rawn chaw sem

Animal Husbandry & Veterinary (AH&Vety) minister C Lalsawivunga chuan nimin khan Selesih AH&Vety Farm-ah Durtlang leh Sihphira bawng vulhtu mi 41 hnenah bawng chaw tur páwl a thlâwnin a sem. Páwlte hi Thenzawl Vety Farm-a ran chaw (fodder) chìnnaa thar a ni.

AH&Vety Minister chuan, bawnghnute, artui leh saa intodelh turinchuan ran chaw aṭanga bul ṭan a ngaih thu a sawi a, "A chawa intodelh hmasak loh chuan a intodelh tak tak theih dawn loh a, hemi kawnga hmalakna neih mekah department lama thawktute inpekna a fakawm," a ti a; kut hnathawktute khawsak dinhmun ṭha zawka hlankai chu sorkar ngaih pawimawh a nih thu leh sorkar sum indaih lohna karah a theih chin china hmalak zel a nih thu thu a sawi.

Vety department leh kut hnathawktute chu ram innghahna leh hnam zahawma siamna tura mawhphurhna kengtu an nih thu sawiin C Lalsawivunga chuan, "Kut hnathawktute thawh chhuah hi ram economy chawisanna a ni a, an tel loin sorkar a kal thei lo a, chhel takin thawk zel ang che u," a ti.

AH&Vety department hian Thenzawl bakah Selesih, Thingdawl, Lungpuizawl, Mampui leh Siahaahte ran chaw a chíng a; heng hmuna mite erawh hi chu hralh/thawn chhuah tham a nih loh avangin a hmuna ran vulhte tan ruahman a ni.

Nimina ran chaw a thlawna sem bak hi chu man tlawm thei ang bera hralh tum a nih thu sorkar thuchhuah chuan a tarlang.