Railways-a hnate Aizawlah exam theih dawn vangin lawm

MZP Gen. Hqrs chuan thuchhuah siamin, Railways hnuaia hna hrang hrang awmte Aizawlah exam theih a ni dawn ta chu lawmawm an tih thu an tarlang.

MZP chuan, Mizoramah rêl a lo luh dawn avangin Railways-a hna hrang hrang lakna tura exam Mizote'n awlsam zawka an hmachhawn theih nan Mizoram Governor leh Mizoram Rajya Sabha MP hnenah hma la turin an ngen tih an tarlang a, "Governor Gen. VK Singh leh Pu K. Vanlalvena, MP, Parliamentary Committee on Railways member ni bawkte'n MZP ngenna ngai pawimawh a, theihtâwp an chhuah avangin an chungah kan lawm hle," an ti.

Railways hnuaia hna hrang hrang awmte Aizawlah exam a theih tawh dawn avangin diltu Mizo ṭhalai pawh an pun phah nia an hriat thu MZP chuan an tarlang bawk.