Union Textile minister Gangwar-a'n Aizawlah Centre pahnih a hawng
Union minister of state (independent charge) for Textiles Santosh Kumar Gangwar chuan nimin khan ZOHANCO-a Weavers' Service Centre leh Industrial Growth Centre, Luangmuala Apparel and Garment Manufacturing Centre-te a hawng.
Union minister hian nimin chawhnu khan Aizawl a lo thleng a; Textiles ministry-a secretary Sanjay Kumar Panda-in a rawn ṭawiawm. Industries minister H Rohluna leh parliamentary secretary Joseph Lalhimpuia ten an lo dawngsawng a; nizan khan Aizawlah a riak a, vawiinah Mizoram a chhuahsan leh ang.
Santosh Kumar Gangwar hian Weavers' Service Centre a hawn tâk chu a fang kual nghal a, puantah laite leh Mizo puan zeh chi hrang hrang an pholante chu a enkual. Weavers' Service Centre hi Textiles ministry hnuaia din a ni a, puahtah leh a kaihhnawih chi hrang hrang tihhmasawnna tura din a ni. Thawktu mi pakua awm tura tih ni mah se, tunah chuan mi pali chiah an la awm.
Apparel and Garment Manufacturing Centre hawnna inkhawm chu Tourist Lodge, Chaltlangah hman a ni. Minister Santosh Kumar Gangwar chuan, prime minister Narendra Modi-a'n puantah lama hmarchhka bial hmasawnna tur a ngaih pawimawh thu sawiin, "Apparel and Garment Making Centre hi hmarchhak state tinah hawn a ni," a ti a; Mizoram tihmasawntu a nih a beisei thu a sawi.
Industries minister H Rohluna pawhin thu sawiin, Ministry of Textiles ṭanpuinaa Weavers' Service Centre leh Apparel and Garment Manufacturing Centre din tharte chuan Mizoram ei leh bar dinhmun a tihṭhat theih a beisei thu a sawi a, "Heng project kan siamah Textiles Minister-in hma min lakpui avangin kan lawm hle a ni," a ti.
H Rohluna chuan, Mizorama Ministry of Textiles hnuaia hmalaknate a hlawhtlin mek thu sawiin, Five Year Plan 11-na hnuaiah Integrated Handloom Development Scheme (IHDS) hlawhtling taka kalpui a nih thu te, NERTPS kalpui ṭan a nih thute a sawi. IHDS chu cheng nuai 112 hu a nih thu sawiin, "First instalment cheng nuai 30.38 hmuh tawh a ni a, July 15, 2015-ah ṭan tum niin, mi 1,130 velin hna an hmuh phah beisei a ni," a ti a; sum la pek chhuah lohte pawh pe chhuak thuai turin a ngen.
Industries Minister chuan, cheng nuai 201 hû project, Technology Upgradation Project atana sum hmuh turte chu pe chhuak thuai turin a ngen a, "Cluster Development Project cheng nuai 1644-ah first instalment nuai 358 hmuh tawh a ni," tiin, CDP hnuaia tih tur angte ṭha taka tih zel a nih thu a sawi.
Textiles Minister hian nimin tlai khan Governor Lt.Gen. Nirbhay Sharma a kâwm a, chumi hnuah chief minister Lal Thanhawla nen an inkâwm leh bawk.