KHAWTHLIR

Punkhawm khap
Aizawl Sub-Divisional Magistrate chuan thupek chhuahin, July 7-9, 2015 chhungin Assembly budget session neih a nih dawn avangin July 3-11 chhung chu Aizawl Head Post Office aṭanga Raj Bhavan chhim lam gate inkarah mipui punkhawm a khap a; chawnghei leh bengchheng siam a khap bawk.

MHIP in hawng
Lunglei Rahsi Veng MHIP building sak thar chu nimin khan Lunglei High Powered Commitee vice chairman S Laldingliana'n a hawng. In hi Rajya Sabha MP Ronald Sapa Tlau fund Rs. 6,00,000 hmanga sak a ni a, a hawnnaah hian MLA Chalrosanga Ralte pawh a tel a ni.

Mi bo zawng
Vairengte Police Station chuan Rohminglui (200 d/o Neihkima (L), Vairengte State Veng chu Ningani zan dar 8 vel aṭangin a awmna chin hriat a nih loh thu an tarlang. Police tarlan danin, Rohminghlui hi bengngawng leh tawng thei lo a ni a, ft. 4'10" vela sang niin, a chhuah laiin pollar pawdal leh cotton jeans a hâ a, silipar a bun. Amah âwm ang hmute chu Vairengte PS telephone number - 03837-261077 ah hrittir turin an ngen a ni.

Ngaihdam dil
Aizawla Kawrtethawveng Welfare Committee chuan thuchhuah siamin, July 1, 2015 zana Zarkawta thisen chhuahna thlenga pawi khawihtu zingah an khaw mi, Laldinpuia s/o J Rinmawia a tel ve chu pawi an tih thu leh zahthlak an tih thu an tarlang a; kut tuartute leh an chhungte bakah, Mizoram mipui hnenah ngaihdam an dil. Mi kuttglaktute chu a na thei ang bera hrem ni se an duh thu an sawi bawk.

Kum 150-na lawm
Salvation Army, Central South Division chhunga corps hrang hrang leh society hrang hrangte chuan Salvation Army kum 150 tlin an lawm chhunzawm zel a, nimin khan Divisional headquarters chuan Central Jail-ah rawngbawlna an nei.