Eiruk thubuaia hming lang Engineer-te Bail dilna ngaihtuah hun sawn

Kau Tlabung Mini Hydel project leh Tui­pang­lui Mini Hydel Pro­ject-a eirukna thubuai vanga PWD leh Power & Electricity engineer pakuate anticipatory bail dilna chu nimin khan Special Court (PC Act)-ah ngaihtuah tur a ni a, Court-ah document a kim loh avangin ngaihtuah hun sawn a ni.

Engineer-te ukil chuan, Kau Tlabung leh Tui­panglui mini hydel project chungchangah hian kum 2008-ah FIR thehluh tawh a nih thu a sawi a, "He thubuai chungchang hi sawi tur chuan kum 2008 aṭanga sawi ṭan a ngai a ni," a ti.

Prevention of Corrup­tion Act khawihtu Special Judge Lucy Lalrinthari chuan, kum 2008 vela document-te chu a kawl loh thu sawiin, "Court document-a awm lo chu ngaihtuah theih a ni lo," a ti a; document-te chu ngaihtuah turin sorkar ukilte a hriattir.

Kum 2008 vela docu­ment pawimawhte chu sorkar ukilte'n an zawng ang a, an hmuh chuan Special Court-ah an thehlut ang. Engineer-te anticipatory bail dilna chu August 27, 2015-ah ngaihtuah leh tura tih a ni.

Anticipatory bail dil engineer-te chu - CL Thangliana, Liansanga, Vanlalduhsaka, Laldela Sailo, R Lalthlanthanga, Lalzawmthanga, N Ranjit Singh, K Lalhlunthanga leh Vulmawia te an ni.