January-May ah Champhai district-ah HIV hrik pai mi 44 hmu chhuak

District Level National AIDS Con­trol Programme chu nimin khan Cham­phai ICTC Councelling Centre-ah an ṭhu­khawm a; kumin January-May chhungin Champhai district-ah HIV hrik pâi mi 44 hmuh chhuah a nih thu tarlan a ni.

Meeting-ah hian, Champhai district chu thisen endikna aṭanga HIV hrik pâi tam tak hmuh chhuah a nih avangin zau zawka ṭan lak dan ruahman a ṭul thu an sawi a; HIV hrik a darh zel lohna tura mipui náwlpuite nen thawhho dan kawng dap a ṭul thu an sawi bawk.

Meeting-a tarlan danin, January-May 2015 chhung khan Champhai district chhungah mi 1,895-te thisen endik a ni a, chung zinga 790 chu nu nau pai an ni. Thisen endik aṭangin mi 44-in HIV hrik an pâi tih an hmuchhuah. HIV pai hi thisen endik aṭangin 2.3% a ni.

HIV Sentinnel Surveillance 2012-13 in a tarlan danin, Mizoram chu India rama HIV hrik pai tamna ber pahnihna a ni a, Mizoramah hian mi 100 zela 0.68 (0.68%)-in an pâi anga chhût a ni. HIV hrik pai tamna ber Nagaland-ah chuan mihring zawng zawng zinga 0.88%-in an pâi anga ngaih a ni.