Chanchinbumite tan workshop buatsaih

Digital India Week hmanna kal mekah Information Communication & Technology (ICT) department chuan nimin khan chanchinbumite pualin Aizawla IPR Conference Hall-workshop an buatsaih.

Workshop-ah hian ICT secretary C Lalhmachhuana'n thu sawiin, "Mizote'n hmasawn kan duh a, internet chak leh ṭha kan duh a, mahse tower erawh kan bul hnaiah kan dah duh si lo hi a pawi a ni. Insawiṭhaihna âwiha hmasawnna tur kawng kan dâl tlat hi sim a hun hle a ni," a ti a; mobile phone tower aṭanga radiation chhuak chu mihring tan a hlauhawh tih finfiahna a awm loh thu a sawi. MJA president Vanlalrema Vantawl-in thu a sawi bawk.

Workshop-ah hian Digital India Week puala hawn tâk CM Online kalpui dan leh a hman ṭangkai dan tur sawifiah a ni. An sawi danin, CM Online hi mipuite'n an harsatna leh hriat chian an duhte chief minister hnena an thlenna tur a ni a; www.cmonline.mizoram.in leh mobile phone no. 9248006202-ah thlen theih a ni ang. Phone no. 9248006202-a SMS hmanga thu thlen dawnin a tir berah 'CM' tih ziah hmasak tur a ni.

Mizoram University-a Mass Commu­nication department-a assistant professor Irene Lalruatkimi'n 'Digital India & Journalism' tih thupui a sawi a, "Digital hian awlsamna a thlen a, khawvel hmachhawn zel thei tura intuaithar turin journalist-te'n ṭan an lak a ngai," a ti. Journalist-te'n journalism ethics an zawm a ngaih rualin, Mizo leh Kristian nunphung mila thil kalpui thiam a ṭul thu a sawi.

National Institute of Electronics and Information Technology (NIELIT)-a scientist-B C Zoremsanga'n 'Cyber Crime & Security' tih thupui a sawi. C Zoremsanga chuan Mizoramah mithiam filawr awmherh an la awm lo tih a sawi rualin, inzirtir lâwk a ṭul thu a sawi a, "Computer, phone leh thil dang hmanga mi tihmualpho leh bumte hi hrem theih a ni a, a hman dan tâwk thiam a ṭul ," a ti.

Facebook leh Whatsapp vela mi buma awm lohna turin rilru puthmang dik neih hmasak a ngaih thu sawiin, C Zoremsanga chuan, hausak châkna thinlung putu chu sum tawktarh hmangin bumthlûk an awl bik a, bum an tawk fo a ni," a ti. Social media chu thu thehdarh nan chak viau mah se, a rintlak loh fo ṭhin tih a sawi.