Aizawl district-a hnathawhte thlirlet

Aizawl District Vi­gilance and Monitoring Committee chu nimin khan an chairman CL Ruala, Lok Sabha MP hoin Secretariat Conference Hall-ah an ṭhukhawm.

MP CL Ruala chuan, sorkar laipui hmalakna hrang hrang a taka chhawrtu leh neitu chu mipui an nih thu a sawi a, "Kan tû leh fate chhawr ṭangkai zel tur a ni tih hriaa MGNREGS leh sorkar scheme dang kaltlanga hna an thawh apiang neitu thinlung púa thawh a pawimawh. Chutiang thinlung an put phawt chuan an hnathawh a ṭha ngei ngei ang," a ti.

Meeting-ah hian Ja­­nuary-May, 2015 chhunga Ministry of Rural Deve­lopment kaltlanga Aizawl district chhunga hmalaknate thlirho a ni.

PMGSY-ah chuan May 2015 thleng khan kawng laih hna thawh zawh tawh 38 awmin, hna kal lai pasarih a awm. Swachh Bharat Mission (Gramin) kaltlangin APL chhungkaw 304 leh BPL chhungkaw 157 hnenah êk-in pek a ni tawh.

Indira Awas Yojana (IAY) kaltlangin nikum chhung khan thingtlang khuaa cheng chhungkaw 70 tan chenna in saksak a ni a; MGNREGS hnuaiah kum 2014-15 chhungin inhlawhna ni 27 siam a ni a, kuminah ni hnih siam tawh a ni.

Meeting-ah hian MLA panga - John Rotluang­liana, R Lalrinawma, KS Thanga, Ngurdingliana leh Lalrinawma te an tel.