OIL-in hmun 2-ah lei verh hna an zo Beisei ang gas & oil an hmu rih lo

Oil India Limited (OIL)-in Maubuang leh Keifang khaw dáia tuialhthei leh boruak alh thei zawn hna thawka lei an verh chu an zo tawh a, an beisei angin oil leh gas an hmu lo nia thu dawn a ni. Hetih lai hian, Oil India Limited bakah, Oil and Natural Gas Corporation (ONGC)-te chuan hmun dangah lei an la verh leh dawn.

OIL-in Mizoram chhung hmun pahniha oil leh gas zawnga lei an verh zawh tawh chungchanga Vanglaini palai zawhna chhangin, Geology and Mineral Resources (GMR) minister H Rohluna chuan, "Oil India-te hian Maubuang leh Keifangah lei verh an tum chin target an zo tawh a, tunah chuan an insaseng rih," a ti.

H Rohluna chuan, Maubuanga lei verhah a tira beisei ang a phâk lo a, Keifang lam dinhmun erawh chu OIL lamin an sawi ṭha duh rih lo tih sawiin, "An hlawmchham tih puan a la awm lo," a ti a; an thil hmuh chhuah angte leh Mizoram leilung dinhmun chu uluk takin an zir chiang zel dawn tih a sawi.

Minister sawi danin, Oil India hian Maubuang rama oil leh gas zawngin kum 2014-ah lei an verh ṭan a, an target lei chhung metre 4,500 vel an laih hnuah kum 2015 tawp lamah an duhtawk a ni. Keifang dáiah December 2015-ah an lai
ṭan leh a, metre 3,500 verh an tum laiin, metre 3,800 an verh a, an verh tur ang an verh tlin tawh avangin kumin August thla laihawl vel khan an duhtawk leh a ni.

Oil India-te chuan Thenzawl leh Phul-mawi ramah lei an la verh leh dawn tih sawiin, Rohluna chuan, "Verh turin an inpeih vek tawh a, mahse, an la ṭan thei rih lo a, uluk takin an zir chiang hmasa ang," a ti. Mizoram leilung chu an tan la hmelhriat ngai vak loh a nih thu sawiin, "An beisei aiin leilung a chang a, an beisei aia a letin an verh hun chhung pawh a rei a ni," a ti.

H Rohluna chuan, Oil India-te chuan Phulmawi leh Thenzawl ramah lei an verh leh dawn tih sawiin, "Aerial survey (chung lam aṭanga enfiahna)-te nen an ti dawn a, Civil Aviation lamah pawh phalna an la tawh," a ti a; aerial survey tih nan USA khawl changkang tak hman an tum thu a sawi.

GMR Minister sawi danin, OIL-in Maubuanga lei an verhnaah gas/oil an hmu ngei a, an hâl chhinnaah pawh a alh a, mahse, an beisei ang taka tam erawh a ni loa ngaih theih a ni. ONGC-in Meiduma lei an verhnaah pawh gas a awm a, gas pût nia hriat an hâl chhinnaah pawh a alh a ni.

ONGC hian Meidum lamah lei an verh hnuah, Zanlawnah lei an verh leh a, an zo ve ve tawh. Meidum lama oil/gas a awm ngei tih an hmuh laiin, Zanlawn lamah erawh an beisei ang an hmu lo nia thu dawn a ni.