November aṭangin Bru endik ṭan dawn Sorkar leh HPC(D) inbiak hun la tifel lo

Tripura refugee camp-a Bru awm, Mizorama hruai kîr turte chu November 2016 aṭangin endik ṭan a ni dawn. Hetih lai hian, Mizoram sorkar leh HPC(D)-te inbiak leh hun tur tihfel a la ni lo.

Vanglaini palai zawhna chhanga Home department additional secretary Lalbiakzama sawi danin, Mizorama Bru hruai kîr turte chu Mizoram khua leh tui an ni ngei em tih endik a ni dawn a, kumin November thla tìr aṭangin endik an ni dawn a, endik hna thawh zawh a nih hunah a ṭul angin lak let hna kalpui a ni ang. Bru lâk lêt turte chu Mizoram Electoral Roll 1995-a awm tawhte leh an thlahte an ni tur a ni.

Thu dawn danin, Bru endik tur electoral roll-a chuangte chu thliar fel vek an ni tawh a, chumi hmang chuan Mizoram khua leh tui dik takte chu awlsam taka hriat theih a ni ang.

Tun dinhmunah Tripura-a refugee camp hrang hrang - Kas-kau, Khakchangpara, Hamsa-para, Asapara, Naisingpara leh Haza-cherra-ah Mizorama lak let tur chhungkua 2,594 an awm. Mizorama lo kîrte chu Mamit dis-trict chhunga khaw 13 - Teirei Forest, Bâwngva, Dilzawl, Dâp-chhuah, Suarhliap, Chilui, Tlang-khang, Nàlzáwl, Khawhnai, Tui-rûm, North Sabual, Khanṭhuam leh Phaizau-ahte dah tura ruahman a ni.

Bru chhungkua Mizorama lette chu ruahmanna awm sang angin, Rs. 87,500 leh kum khat chhung ration a thlawna pek tur an ni.

Hetih lai hian, Mizoram sorkar leh HPC(D)-te inbiak leh hun tur chu tihfel a la ni lo. HPC(D)-te hian an thil phût hrang hrangte chu Mizoram sorkarah an thehlut tawh a, chu chu Mizoram sorkarin an zir chian hunah inbiak hun tur ruahman a ni ang. Inbiakna hi September 2016 chhung ngeia neih tum a ni.

Mizoram sorkar leh HPC(D)-te hi August 10, 2016 khan Tourist Lodge, Chaltlangah an inbia a, September 2016 chhunga inbe leh turin thu an dah a ni.