South Khawlekah nufa thiin chhar Tualthattu nia insawi man a ni

Nimin zing dar 8:48 khan South Khawlekah Suilianmawii (40) leh a fapa Muanpuia (5)-te chu an inah thia hmuh an ni. anmahnin thattua puh, Isak Lalrinmawia (21) s/o Lalremruata (L), South Khawlek chu nimin vek khan police-te'n an man.

Lunglei police-te aṭanga thu dawn danin, Suilianmawii-te nufa hi September 11, 2016 zana thah nia ngaih a ni a; hmuh an nih laiin Suii hi saruakin a awm a ni.

A thattua puh Isak Lalrinmawia hi a pi nen chauha khawsa an ni a; nimin zing khawvar hma khan an khaw ṭhenawm New Khaw-lêk V/C member Lal-dinpuiia hnenah kalin, Suilianmawii te nufa a thah thu a puang a, a inpuanna aṭangin Suii te in chu enfiah nghal a ni. Isak Lalrinmawia hi New Khawlêk V/C-te'n police kutah an hlan.

South Khawlêk leh New Khawlêk khuate hi khaw lian lo tak, in 25 vel ve ve awmna a ni a, V/C an inṭâwm a; Lunglei district huam chhunga mi a nih angin, Bunghmun Police Station-a mite bakah, Lunglei Police Station a-
ṭangin SDPO an kal a ni.