KHAWTHLIR

Eng awm dawn lo

Power & Electricty dept. chuan thuchhuah siamin, vawiin chawhma dar 9 aṭanga tlai dar 4:30 thleng 33kV indoor sub station, Aizawl chawmtu 33kV line hrui lian zawk thlak hna thawh chhunzawm a nih dawn thu an sawi a, hnathawh hun chhung hian power supply pek chhuah a nih dawn loh avangin, Electric Veng, Chhinga Veng, Dawrpui, Zarkawt, Tuikual South Veng ṭhenkhat, Treasury Square, Chanmari, Chaltlang Dawrkawn leh chhehvel, Ramhlun PWD mual, Laipuitlang, Aizawl Venglai, Ramthar, Ramthar North, Ramhlun South, Ramhlun North leh Armed Veng ten eng an neih dawn loh thu an tarlang.

In kâng

September 11, 2016 zan dar 8 vel khan Siaha New Coloney Venga S Pawkhai in a kâng a, bungrua chuh hman lohin a kâng ral. Thu dawn danin, in hi Assam type, chhawng li a ni a, chhungkaw paliin an luah a ni. In kan chhan hriat chian a ni lo.

Gas endik

Champhaia Legal Metrology enforcement-te chuan, nimin khan MIZOFED-a eirawngbawlna gas thleng an endik a, truck pakhatin gas bûr 294 a phurhte chu a bûk a tling ngei tih an finfiah. Legal Metrology enforcement chuan, gas búrte chu a bùk dik a ni em tih leh a inchâr (seal) ṭha em tih en chîk turin mipuite an ngen a ni.

Thawhho rel

Champhai SP thar Brijendra Kumar Yadav chuan, nimin khan Champhai district-a thuthar thehdarhtute a kâwm a, Champhai district kaltlanga ruihhlo tawlh rûk ṭhin titawp tura hmalakho an rel. Champhai district-ah hian kum 2015 aiin kumin 2016-ah thubuai ziah luh 19-in a tlahniam a ni.

DC-in enfiah

Kolasib DC H Lalengmawia chuan, nimin khan Kolasib khaw chhunga AH&Vety leh Industries department hnuaia NLUP dawngte tlawhin, an hnathawh dan a enfiah. DC chuan, NLUP chu a dawng hmasa tan hlawhtlinpui a hun tawh avangin an hmasawn dan leh an chhawr ṭangkai dan a hmun ah kala an endik fo tur thu a sawi.