ICT department-in Skoch Award an lawm

Informtion and Communication Technology (ICT) department-in e-Governance project an kalpui ṭhat avangin Skoch Award paruk an dawng a; nimin khan ICT minister Lal Thanzara hoin a pisaah an lawm.

Lal Thanzara chuan, India rama e-Governance kaih-hnawihah chawimawina sang Mizoram ICT department-in a dawng chu lawmawm a tih thu sawiin, "Award hian ICT department mai ni lo, Mizoram pum a chawimawi a. He chawimawina hian thawhrimna, inpekna leh thawhhona a ṭhatzia a tilang a, thawktute thawhrim rah kan seng a ni," a ti.

ICT secretary C Lalhma-chhuana chuan, chawimawina an dawnte chu department-a thawktute thawhrimna vang a nih rualin, district tina hotu lu, DC-te ṭawiawmna ṭha tak an hmuh vang a nih thu a sawi.

September 8-9, 2016 chhung khan Hyderabad-ah Skoch Award Summit neih a ni a, India rama e-Governance project ṭha an thlan chhuahah Mizoram sorkara ICT department-in project an siam hmangin award paruk an dawng.

Skoch Award dawng tur hian inelna chi hrang hrang a awm a, document pawimawh-te thehluh a nih hnuah New Delhi-ah ICT & Mizoram State e-Governance Society (MSeGS) officer-te kal-in presentation an pe a; chumi hnuah Hyderabad-ah mi thiam kalkhawmte zingah exhibition neih a ni.

ICT department-in award an dawnate chu e-District State Rollout Pro-ject, Content Manage-ment System leh Inventory Management System-te an ni.

e-District project-ah hian mipui hman ṭangkai theih service 34 a awm a; service hrang hrangte chu e-District Facilitation Centre (DC office), Common Service Centre (CSC) leh Rural Information Kiosk (RIK) aṭangin pek chhuah mek a ni. Mizoramah chuan kum 2012 aṭanga tun thleng hian e-transaction cheng nuai 13.67 a awm tawh.

ICT engineer-te'n Content Management System (CMS) an siam a, sorkar department hrang hrang-te'n awlsam taka an department website siam theihna tura duan a ni. CMS hmang hian sorkar department website 141 siam a ni tawh.

MSeGS (Mizoram State e-Governance Socie-ty) engineer-te pawhin Inventory Management System an siam a; sorkar office bungrua chi hrang hrang - stationery, electrical goods, furniture leh thil dangte felfai taka enkawlna tura siam a ni. Tunah hian Secreta-riat Administration Depart-ment (SAD)-in an hmang mek a, department dangte pawhin hman tumin hma an la mek.