Kan sorkar chuan chawah Kan intodelh ang - Zoramthanga

MNF president Zoramthanga chuan, MNF an sorkar leh chuan chaw-a intodelh turin theih-tawp an chhuah dawn niin a sawi a, "Delhi lam tlawn reng leh Food Corporation of India (FCI) lam ngaituah reng a ngai tawh lo ang," a ti.

Zoramthanga hian nimina Mizo Hnam Runa inkhawmah thu sawiin, "Mizoram hi lehkhathiam rual awm khawmna ram a ni a, ṭawng khat hmang leh sakhaw khat bia, ram ralmuang kan ni. Sik leh sa boruak nuam tâwk chauh, ruahtui tlak ṭhatna ram a ni a, kan sorkar hunah chuan lei hnuai hausakna leh lei chung hausakna kan hai chhuak ang," a ti a; mahnia intodelh thei tura hma an lak tur thu a sawi.

MNF President chuan, Mizoramin remna leh muanna a neih theihna tura kawng bumboh thui tak a zawh dan te, MNF chak loh laia India sorkar nen inremna siam lo a, MNF dinhmun a ṭhat lai leh a chak lai taka inremna ṭha tak siam a ni chu Pathian remruat a nih thu a sawi bawk.