AMC-in hnam dang mi 124 hnenah Licence an pe niin ZNP-in an sawi

ZNP chuan thuchhuah siamin, RTI Act hmanga an zawhna Aizawl Municipal Corporation (AMC)-in an chhannaah, September 8, 2016 thleng khan AMC Licensing Regulations, 2012 hnuaiah hnam dang 124 hnenah Aizawl khawpui chhunga sumdawn phalna an pe tawh tih an ziak niin an tarlang.

AMC-in hnam dang hnena sumdawnna licence an pek chungchang hi nimin khan ZNP president Lalduhoma'n an party pisaa inkhawmah a sawi a, "Hnam dang mi 124 hnena sumdawn phalna licence pek a ni hi pawi kan ti em em a, kan dan hman mek him loh vanga min chîmral theihna tur keimahni Mizote ngeiin licence an pe hi pawi kan ti a ni," a ti.

Lalduhoma chuan, municipality chu Mizote tana siam a ni lo nia sawiin, "Vairama an hman ang anga MNF-in an hmang ve hi kan hnam tan a him lo a, kan dem tak zet a, economics-a chîmral hmasak ber tur chu kan Aizawl khawpui hi a ni," a ti a; municipal corporation chu khawpui dangah tih ve chi a ni lo niin a sawi.