Lirthei laka mipui himna tur sawiho

Nimin khan Mamit addl. DC H Lianzela hoin, Mamit khawpui chhunga village council hruaitute leh offcial-te'n lirthei laka mipuite him tlan zawkna tur an sawiho.

Meeting-ah Mamit khawpui chhunga kawngpui chhesual thawmṭhat ngai te chu village council hrang hrangte'n anmahni huam chhung ṭheuhte lo enfel a, PWD Mamit hotute hnenah a tul anga hmalak sak tura thlen ni se tih te; rui chunga lirthei khalh a lo tlem zawk theihnan leh mipui tana him lo leh hlauhawma lirthei khalte vengtina khawtlang hruaituten lo thlithlai se tih te; rui chung leh mipui tana him loa lirthei khalh hmuh an nih chuan DTO hnenah hriattirin an licence cancel thlenga hmalak sak tura thlen ni se tihte leh lirthei thar neite chu registration an tih dawnin a dahna tur (garage) an nei ngei em tih khawtlang hruaituten lo finfiah se tihte an rel.

Heng bakah hian kawngpui a lo thawl zawk nan kawngsira lirthei dahte leh insakna bungrua kawngpui dipa dahte thenfai ni se tih te; kawngpui sira motor workshop neiten a hnawk lo thei ang bera an motor siamte dah thin tura hriattir ni se tih te; lirthei laka chetsualna a lo tlem zawk nan kawng pengṭhuam pawimawh bikah teroad sign tar thar leh ni se tihte leh kawngpui sira lunglakna (Quarry) neite Mamit SP hoin enfiah ni se, mipui tana himlo chinte chu an quarry te chawlhsan tir ni se tihte an rel bawk.