FCI kudam sawn chungchang sawiho

Food Civil Supply & Consumer Affairs (FCSCA) minister John Rotluangliana chuan, nimin khan a pisa-ah Mizoram University-a department hrang hranga hotu aiawh te, Students Council hotute leh Joint Action Committee hruaitute a kawm a, Ramrikawna FCI kudam chungchang a sawipui.

John Rotluangliana chuan FCI kudamin MZU tan harsatna a thlen hrang hrangte chu a hriatpui thu sawiin, "Tunah phei chuan FCI hmun chauh ni loin gas bottling plant leh oil depot hmun tur zau zawk leh lian zawk an buaipui reng a ni. Ram leh hnam tana ṭha tur leh zirlaite hmakhua tur te, mipuite tana hamthatna ngaihtuaha hmalak tak tak a nih dawn chuan dinhmun inhriatthiam tawn sak in, harsatna leh lungkhamte hmaichhan ngeiah sawiho a ṭha a ni," a ti.

FCI kudam sawn chhuahna atan hian Sihhmui leh Sairang bakah Aizawl hmun hrang hrang ṭha awma an ngaih an lo enkual tawh tih sawiin FCSCA Minister chuan, "FCI hotute leh an engineer-te nen hun rei taka ṭang tawha hmun hrang hrang enho a ni tawh a, FCI lamin an duhthusam an la hmu lo," a ti a, Mizoram sorkar chu kudam sawn tura thu tawp siam thei tu a nih loh avangin harsatna a awm thu a sawi.

John Rotluanglian-a chuan FCI kudam sawnna atan rel kawng pawh theihna tur hmun ṭha leh kudam han din mai theihnate hual an la nei tih sawiin, "Kan hmun thlan hi FCI lamin an rawn thlan a, an approve zel a ngaih si avanga hun duh rei a ni. Buhfai hi nitina mi tin ten kan mamawh a nih si avangin uluk taka dawn leh hmalak a ngai. Kudam tur atana helaia hmun remchang tura ngaih leh thlan hnamdang phai zawl hmuna cheng ṭhinten min duhpui ṭhin lo," a ti.

Thusawitu dang parliamentary secretary (FCSCA) TT Zothansanga chuan, "Eng pawh ram tana ṭha tur nia ngaih kan sual dawn a nih chuan beidawn mai tur ani loa,a hma tiam zela hotute leh a tithei leh hria te dawr in kalpui
ṭhin a finthlak a ni," a ti a, a eng amah hmaa innawr vak emaw rum taka chet nghal a fuh loh thu a sawi.

MZU zirlaite chuan kudam sawn tura hmalakna-
ah theihtawp chhuah an inhuam thu leh an tangkai theihnaah chuan tlanchhiat
an tum loh thu an sawi.