Mizoram account-a sum dah loh vangin Hindi zirtirtute hlawh la pe thei lo

School Education department Media Cell chuan thuchhuah siamin, Mizorama CSS hnuaia Hindi zirtirtu mi 1,305-te thla hnih hlawh tur sorkar laipuiiin August 16, 2016-a Rs. 6,31,94,568 a rawn pek chu RBI-a Mizoram sorkar account-ah sanction order ruala dah nghal a nih loh avangin pek nghal theih a ni lo tih a tarlang.

School Education department tarlan danin, Hindi zirtirtute hlawh tur hi sorkar laipuiin August 16, 2016-ah sanction a tichhuak a, August 23-ah School Education department-in dawngin, Finance department-ah budget allocation an dil nghal. Mahse, sum chu sanction order rualin Reserved Bank of India (RBI)-a Mizoram sorkar account-ah dah nghal a ni lo a; chuvang chuan zirtirtute hlawh an la pe thei lo a ni.

School Education department Media Cell chuan, "Ministry of Human Resource Development-a a mawh-phurtute hnenah sum hi Mizoram sorkar account-a thun luh a nih theihna turin a ûm zui reng a, nikum lama thla 10 (sawm) hlawh (March-December, 2015) an sanction aṭanga hman bâng Rs. 3,15,933 pawh tinung (revalidate) turin Govt. of India ngen a ni," an ti.

Thuchhuah tarlan danin, sorkar laipuiin kum dangah chuan sanction thar an pek rualin hman bâng an revalidate ṭhin a, kuminah erawh chuan sanction thar chauh hmuh niin, sum bâng revalidate a ni lo.

School Education department thuchhuah chuan, "Sorkarin theihtawpa a ûm zui reng avang hian tun aṭanga hun rei lo têah January leh February hlawh pek theih beisei a ni," a ti.

Thu dawn danin, Centrally Sponsired Scheme (CSS) hnuaia Mizorama Hindi zirtirtu mi 1,305-te'n kumin (2016)-ah hlawh an la la lo a; thla riat chhung hlawh an la tawh lo a ni.