Rangkachak tawlhrûk thubuaiah Chargesheet buaipui mek a ni

December 14, 2015 zana Aizawl dái, Zampui-manga thlân lung bula rangkachak tawlhrûk suam thubuai chhuitu, Mizoram police-a Special Investigation Team (SIT)-te chuan an thil hmuh chhuah tarlanna (chargesheet) Court-a theh-lut turin an buaipui mek.

Police hotute hnen aṭanga thu dawn danin, SIT-in chargesheet an buaipui mek a, finfiahna
ṭhenkhat tihfel loh a la awm avangin peih fel a la ni lo. Finfiahna ṭhenkhat chu Tripura-a Forensic Science Laboratory-ah endik tura thawn a ni a, chu chu endik zawh a la ni lo.

Zawhna chhangin police hotute chuan, "Finfiahna kan mamawh ang angte kan tihfel kim veleh chargesheet hi Court-ah thehluh kan tum," a ti.

Hetih lai hian, Mizo-ram sorkarin thubuai chhui tura ngen, Central Bureau of Investigation (CBI) chuan Mizoram sorkar hnenah an chhui dawn leh dawn loh an la hriattir lo. Thu dawn danin, CBI hian thu leh hla an la nei lo a, Mizoram sorkarin CBI-te chu a ngaichâng zel rih a ni.