Zo fate rorelna pakhat hnuaia khawsa turin Pathianin rorelna a kalpui mek - Thanzara

Zo Re-unification Organisation (ZORO) chuan nimin khan Aizawla IPR Auditorium-ah United Nations-in Declaration on the Roghts of Indegenous Peoples a puan champha kum 9-na an lawm a; khuallian, Minister Lal Thanzara chuan, Zo fate chu rorelna pakhat hnuaia khawsa za turin Pathianin rorelna a kalpui mek tih a sawi.

Lal Thanzara chuan, Mizo ethnic group-in zia chi hnih a nei a, chungte chu hmuh theih leh theih lohte a nih thu a sawi a, "Kan hnam identity hi a la nung reng a, hnam atan Pathianin Mizote min siam a, Mizo kan ni mek a, kan ni kumkhua tur a ni... Kan vela hnamte hian min assimilate (chîmral) lo a, keimahni duh thuin kan hnam zia kan kalsan chuan remchanga hmangin vai ho hian min chimral thei a ni," a ti.

Minister chuan, "Kan hnam zia, Mizoram leh kan sakhua hi kan humhim a ngai a, hnama min siamtu hian kan ram, hnam leh sakhua a thlawnin min pe a. He mi humhalh tlat hi kan mawhphurhna a ni," a ti a; ram ropui tak ni ṭhin USSR pawh an tlûkchhiat theih avangin, ram hrang hranga Mizote chu rorelna pakhat hnuaia an la awm ngei a beisei thu a sawi.

Pathianin Mizote chu hnam ropui leh lian zawkah a la siam a beisei thu sawiin, Lal Thanzara chuan, "Pathianin Zofate hi rorelna pakhat hnuaia khawsa za turin rorelna a kalpui mek a, kan duh emaw duh lo emaw, he thlipui hian mi lên tel tho tho dawn," a ti.

Minister Lal Thanzara chuan, "Britain emaw, India emawin ramri min khamsak rih mah se, Chungnungbera hian kan ramrite min la khamsak dawn a ni," tiin, chanchin ṭha puang zarh zel turin Pathianin hun a tih hunah Mizote chu ropui taka an la awm tur thu a sawi a; ZORO-in Mizote rorelna pakhat hnuaia an awm theih nana ṭan an laknaah Pathian hriatpuia hma an lak zel phawt chuan Congress sorkarin a thlawp zel tur thu a sawi bawk.

UN-in Declaration on the Roghts of Indegenous People kum kuana lawmnaah hian ZORO president R Sangkawia pawhin thu a sawi a; MSU Cultural Club leh MZP Cultural Club-te'n hnam làm an entir a, resolution point pathum pass a ni.