KHAWTHLIR

Thisen pe

Republic Veng Branch KṬP chuan, nimin khan an Kohhran Hall-ah blood donation camp an huaihawt a, mipa 47 leh hmeichhia pathumte'n Synod Hospital tan thisen unit 50 an pe.

Free clinic

Armed Veng Branch KṬP chuan an kum 50-na, golden jubilee pualin nimin khan an Kohhran Hall-ah Synod Hospital nen ṭangrualin a thlawna inentirna an buatsaih a; doctor-te'n mi 195-te hriselna dinhmun an endik.

HSS Games tan

Nimin khan Aizawl leh Lungleiah High School Games 2016 ṭan a ni a; Lungleiah chuan HPC vice chairman S Lal­dingliana, MLA-in a hawng. HSS Games hi Aizawl district chuan Aizawla khelmual hrang hrangah nimin khan an ṭan a, sport item chi hrang pasarih - athletics, football, volleyball, basketball, table tennis, badminton leh taekwondo-ahte an intihsiak dawn a; sikul 80 chuang an tel. Kumina HSS Games-ah hian a vawi khat nan Kala Utsav hnuaia intihsiakna hrang hrang - lâm, rimawi, lemziak leh lemchan hmanga intihsiakna a awm dawn. Lunglei district-a HSS Games chu Lunglawn Mualah hawn a ni a; sikul 37 an tel.

Kawng siam phût

Hortoki khaw mipuite chuan Kawnpui leh an khaw inkar kawng, km. 18-a thui Railways motor lianin an rah chhiat siamṭha thuai turin Railways an phut thu Thawh
ṭanni khan Chief Minister hnenah ziakin an thlen. Kawng chhia vanga harsatna an tawhte su kiang turin Railways-in a intiam anga hma a la lo a nih chuan September 17, 2016 aṭangin Kawnpui leh Hortoki inkar kawng chu Railways motor zawhtir an phal tawh dawn loh thu an sawi.

Meizûk that lohzia zirtir

Pine Hill Adventist Academy, Champhai-a Anti Tobacco Club-te chuan Thawhṭanni khan New Champhai kâwn­ah mipui veivâkte chu meizûk ṭhat loh zia an hrilh a; nepnawi dawr, thingpui dawr leh office-ah meizûk ṭhat lohzia inziahna poster tár turin an hrilh.